❧ A Monsieur le Secretain D’avenson, Charles de Saincte Marthe, Salut
J’ay, à l’instigation de quelques uns mes bienvoulants, mis en lumiere, ma Poesie Francoyse (Seigneur tresaymé) plus pour esbattement, et relaxation de mon Esprit, que profession d’icelle Art. Parquoy si je n’y suis tant perfaict, que ceulx, qui y sont consommés : comme Marot, S. Gelays, Seve, la Maison neufve, Chappuy, Fontaines, et aultres Poetes Francoys, divins et treserudits : plusieurs raisons ay je, lesquelles m’excusent, et toy mesme en scays une partie. Or il a pleu à d’aulcuns de mes Amys, me faire l’honneur et le bien, de me rendre par leur escripts tresdoctes, testification de nostre Amytié : celà j’estime, ainsi qu’on doibt estimer toute chose venante du sien Amy, et d’aultant que je n’ay rien plus cher, que leurs Epigrammes, et Epistres, par moy colligées en ce Livre : d’aultant m’a il semblé bon le te donner : comme à celuy, lequel au besoing (ou l’Amytié s’explique) s’est monstré par effect mon Amy. Il te plaira donq’, attendant aultre Œuvre de moy, le prendre en gré : me tenant tousjours pour l’un de ceulx, qui sont tes obeissants. JESUS soit avec toy. De Lyon ce xv. d’Aoust. M.D.XL.